មុខងារ Find My Device របស់ Google គឺជាឧបករណ៍ដែលមានប្រយោជន៍មិនគួរឱ្យជឿ ដែលអាចជួយអ្នកកំណត់ទីតាំងទូរសព្ទ ថេប្លេត ដែលប្រើប្រព័ន្ធប្រតិបត្តិការ Android ដែលអ្នកភ្លេច ឬត្រូវបានគេលួច។
ជាមួយមុខងារនេះ អ្នកអាចបន្លឺសំឡេងរោទ៍ ចាក់សោ និងលុបទិន្នន័យព័ត៌មានផ្ទាល់ខ្លួនផ្សេងៗដែលមានក្នុងឧបករណ៍របស់អ្នកពីចម្ងាយបាន។
យើងនឹងណែនាំអ្នកនូវអ្វីគ្រប់យ៉ាងដែលអ្នកត្រូវដឹងអំពីរបៀបប្រើ Find My Device ដើម្បីតាមដាន និងស្វែងរកឧបករណ៍របស់អ្នកនៅលើផែនទី។
ដើម្បីប្រើប្រាស់មុខងារ Find My Device បាន គឺតម្រូវឱ្យ៖
- ឧបករណ៍ទាំងនោះត្រូវតែបើក និងភ្ជាប់អ៊ីនធឺណិត។
- ឧបករណ៍ទាំងនោះត្រូវតែបានភ្ជាប់ទៅក្នុងគណនី Google របស់អ្នក។
- មុខងារកំណត់ទីតាំងរបស់ឧបករណ៍ទាំងនោះត្រូវតែបើក។
- បើកមុខងារ Find My Device លើឧបករណ៍ប្រើប្រព័ន្ធប្រតិបត្តិការ Android។
របៀបប្រើ Find My Device៖
- បើកកម្មវិធីរុករកតាមអ៊ីនធឺណិត ហើយចូលទៅកាន់គេហទំព័រ Find My Device (https://www.google.com/android/find) ចូលទៅកាន់គេហទំព័រ Find My Device ដោយប្រើគណនី Google ដូចគ្នា និងគណនីដែលអ្នកប្រើក្នុងឧបករណ៍ដែលបាត់។
- បន្ទាប់ពីចូលទៅកាន់គណនី Google របស់អ្នកហើយ វានឹងបង្ហាញផែនទីដែលបង្ហាញពីទីតាំងជាក់លាក់របស់ឧបករណ៍អ្នក (បើនៅភ្ជាប់អ៊ីនធឺណិត ឬមានថ្ម)។ បើមិនដូច្នោះទេ វានឹងបង្ហាញទីតាំងចុងក្រោយបំផុតរបស់ឧបករណ៍នោះ។
- ដើម្បីស្វែងរកឧបករណ៍របស់អ្នក សូមចុចជម្រើស PLAY SOUND។ វានឹងធ្វើឱ្យឧបករណ៍របស់អ្នកបន្លឺសំឡេងក្នុងកម្រិតអតិបរមារយៈពេលប្រាំនាទី បើទោះបីជាវាបិទសំឡេង (Mute) ក៏ដោយ។
- ការពារឧបករណ៍របស់អ្នកដោយចុចប៊ូតុង SECURE DEVICE។ អ្នកនឹងត្រូវបានសួរឱ្យបញ្ចូលពាក្យសម្ងាត់ថ្មី ហើយវានឹងចាក់សោឧបករណ៍របស់អ្នក ក៏ដូចជាបង្ហាញលេខទំនាក់ទំនងរបស់អ្នកនៅលើអេក្រង់ដែលបានចាក់សោនោះ។
- ដើម្បីលុបទិន្នន័យដែលមានក្នុងឧបករណ៍របស់អ្នកទាំងអស់ចោល សូមចុចប៊ូតុង ERASE DEVICE។ អ្នកនឹងត្រូវបានសួរឱ្យបញ្ជាក់ការសម្រេចចិត្តម្តងទៀតលើសកម្មភាពនេះ ព្រោះថាការលុបទិន្នន័យរបស់អ្នកទាំងអស់ គឺមិនអាចត្រឡប់វិញបានទេ៕
