បច្ចេកវិទ្យាកាន់តែទំនើប ការវាយប្រហារតាមប្រព័ន្ធអ៊ីនធឺណិតក៏កាន់តែសម្បូរបែប ដូច្នេះយើងក៏គួរមានការប្រុងប្រយ័ត្នឲ្យកាន់តែខ្លាំងផងដេរ។ វិធីមួយក្នុងចំណោមវិធីជាច្រើនទៀតដែលជនអនាមិកប្រើប្រាស់ដើម្បីទាញយកផលប្រយោជន៍ណាមួយពីសកម្មភាពរបស់យើងនៅលើអ៊ីនធឺណិត គឺការប្រើប្រាស់ដានជើងឌីជីថលរបស់យើងបង្កើតការធ្វើត្រាប់តាម។
ដានជើងឌីជីថល គឺសំដៅលើទិន្នន័យ និងព័ត៌មានផ្ទាល់ខ្លួនរបស់អ្នកដែលមាននៅលើអ៊ីនធឺណិត ដូចជាការបង្ហោះនៅក្នុងបណ្ដាញទំនាក់ទំនងសង្គម និងសារអេឡិចត្រូនិកនានាដែលមានឈ្មោះរបស់អ្នក។
ដានជើងឌីជីថល គឺត្រូវបានបែងចែកជាពីរ គឺដានជើងឌីជីថលសកម្ម (ACTIVE) និងដានជើងឌីជីថលអកម្ម (PASSIVE)៖
1. ដានជើងឌីជីថលសកម្ម (ACTIVE digital footprint)
ត្រូវបានបង្កើតឡើងដោយខ្លួនអ្នកផ្ទាល់នៅពេលដែលអ្នកចែករំលែកព័ត៌មានផ្ទាល់ខ្លួនតាមរយៈការចូលវេបសាយ ឬចែករំលែកនៅលើបណ្ដាញទំនាក់ទំនងសង្គមនានា។ សកម្មភាពទាំងនោះរួមមាន៖
- ពេលអ្នកប្រើប្រាស់អ៊ីមែល ព្រោះវាមានផ្ទុកព័ត៌មានរបស់អ្នក ទំនាក់ទំនងរបស់អ្នក និងសារអេឡិចត្រូនិកដែលអ្នកផ្ញើ និងទទួល។
- ការទាញយក (Download) កម្មវិធី ឯកសារ ចម្រៀង វីដេអូ ឬរូបថត គឺសុទ្ធតែបន្សល់ទុកនូវដានជើងសកម្មដែលអ្នកផ្សេងតាមដានអ្នកបាន។
- ដានជើងក្នុងម៉ាស៊ីនរុករក (Search engine) ពេលអ្នកស្វែងរកព័ត៌មានអ្វីមួយនៅតាមវេបសាយ គឺវានឹងរក្សាទុកព័ត៌មានទាំងអស់។
- រូបថត និងវីដេអូដែលអ្នកបង្ហោះនៅលើអ៊ីនធឺណិត នឹងបង្កើតនូវដានជើងឌីជីថលរបស់អ្នក ហើយព័ត៌មានពីអ្នក ដូចជាពេលវេលាបង្ហោះ ទីកន្លែងដែលថត នឹងត្រូវរក្សាទុកក្នុងទិន្នន័យមេ (Metadata)។
- ពេលដែលអ្នកទិញទំនិញនៅលើអនឡាញ ព័ត៌មានអំពីទំនិញដែលបានទិញ កន្លែងដែលលក់ទំនិញនោះ ពេលវេលានៃការទិញ តម្លៃរបស់ទំនិញទាំងនោះ ក៏ដូចជាទិន្នន័យរបស់កាតឥណទាន/ឥណពន្ធរបស់អ្នក នឹងត្រូវបានរក្សាទុក។
- សកម្មភាពរបស់អ្នកនៅលើប្រព័ន្ធផ្សព្វផ្សាយសង្គម ដូចជាការបញ្ចេញមតិរបស់អ្នកលើការបង្ហោះរបស់អ្នកដទៃ ឬចុចតាមដានទំព័រអ្នកណាមួយ នឹងបង្កើតដានជើងឌីជីថល ដែលអ្នកប្រើប្រាស់ដើម្បីឈ្វេងយល់ពីអ្នកបាន។
2. ដានជើងឌីជីថលអកម្ម (PASSIVE digital footprint)
ត្រូវបានបង្កើតឡើងដោយខ្លួនអ្នកផ្ទាល់ដោយប្រយោល ដោយមិនបានដឹងខ្លួន ឬបានអនុញ្ញាតតាមរយៈការប្រមូលយកទិន្នន័យផ្ទាល់ខ្លួនអ្នក ដូចជាតាមដានអាសយដ្ឋានអាយភី (IP) ដោយរក្សាទុកទិន្នន័យជាទម្រង់ខុកខី (Cookie) និងតាមកម្មវិធីកំណត់អត្តសញ្ញាណឌីជីថលនានា។ សកម្មភាពទាំងនោះរួមមាន៖
- ទិន្នន័យទីតាំង ដូចជាឧបករណ៍ដែលប្រើ GPS ដូចជាស្មាតហ្វូន និងថេប្លេត គឺធ្វើការប្រមូលទិន្នន័យទីតាំងនៅពេលដែលអ្នកភ្ជាប់ជាមួយអ៊ីនធឺណិត ដោយទិន្នន័យទាំងនោះអាចត្រូវបានប្រើប្រាស់ដើម្បីតាមដានទីតាំងដែលអ្នកទៅ និងសកម្មភាពផ្សេងៗដែលអ្នកធ្វើ ទោះបីជាឧបករណ៍ទាំងនោះមិនត្រូវបានប្រើក៏ដោយ។
- ទិន្នន័យទម្រង់វិភាគស្ថិតិស្វ័យប្រវត្តិ Biomatric មានដូចជាស្នាមមេដៃ មុខ អាចសម្គាល់ភិនភាគ និងការស្គែនកែវភ្នែក អាចត្រូវបានប្រើដើម្បីកំណត់អត្តសញ្ញាណរបស់អ្នក។ ទិន្នន័យទាំងនេះក៏អាចត្រូវបានប្រើប្រាស់សម្រាប់គោលបំណងជាច្រើន រួមទាំងការស្រាវជ្រាវទីផ្សារផលិតផល និងសុវត្ថិភាពផងដែរ។
- ទិន្នន័យដែលប្រមូលតាមខុកខី (Cookies) ត្រូវបានប្រើប្រាស់ដើម្បីប្រមូលព័ត៌មានអំពីទម្លាប់នៃការរុករករបស់អ្នក ដូចជាវេបសាយដែលអ្នកចូលមើល និងទំនិញដែលអ្នកទិញ។
- អាសយដ្ឋានអាយភី (IP) របស់អ្នក នឹងត្រូវទាញយកមករក្សាទុកពេលអ្នកចូលប្រើប្រាស់អ៊ីនធឺណិត ដើម្បីតាមដានសកម្មភាពរបស់អ្នកនៅលើអនឡាញ៕
