ការគំរាមកំហែងពីមេរោគលើប្រព័ន្ធប្រតិបត្តិការ Android ថ្មីៗនេះហាក់ដូចជាលេចចេញជារៀងរាល់សប្តាហ៍ ឬជាញឹកញាប់ជាងនេះទៀត ហើយមេរោគមួយចំនួនគឺពិតជាគួរឱ្យខ្លាច និងមានគ្រោះថ្នាក់យ៉ាងខ្លាំង។
គ្រោះមហន្តរាយចុងក្រោយបំផុតសម្រាប់ប្រព័ន្ធប្រតិបត្តិការទូរសព្ទរបស់ Google ត្រូវបានបង្ហាញនៅក្នុងរបាយការណ៍មួយដោយក្រុមហ៊ុនសន្តិសុខអ៊ីនធឺណិត CloudSEK ហើយវាបង្ហាញឱ្យឃើញថា គួរឱ្យព្រឺព្រួចដូចរឿងភាពយន្តភ័យរន្ធត់ដូច្នេះដែរ ព្រោះវាជាប្រភេទមេរោគដែលធន់នឹងកម្មវិធីកម្ចាត់មេរោគ។ វាអាចលួចកត់ត្រាការហៅទូរសព្ទរបស់អ្នក លួចទិន្នន័យនៅលើទូរសព្ទរបស់អ្នក មុនពេលទិន្នន័យទាំងនោះត្រូវបានធ្វើកូដនីយកម្ម ហើយចុងក្រោយវាក៏អាចចាក់សោទូរសព្ទរបស់អ្នកដោយអ្នកមិនដឹងខ្លួនផងដែរ។
តើមេរោគ Daam នៅលើប្រព័ន្ធ Android ដំណើរការយ៉ាងដូចម្តេច?
ហេតុផលដែលថា Daam មានគ្រោះថ្នាក់ខ្លាំង ហើយគួរឱ្យខ្លាចដូចរឿងខ្មោចនោះ គឺថាវាដូចជាបិសាចជញ្ជក់ឈាមអ៊ីចឹង ព្រោះមេរោគប្រភេទនេះត្រូវការឱ្យគេអញ្ជើញវាចូលសិន រួចហើយបន្ទាប់មកវានឹងស្រូបជញ្ជក់យកអ្វីដែលវាត្រូវការ។ វិធីដែលវាប្រើដើម្បីលួចចូលទៅក្នុងទូរសព្ទរបស់អ្នក គឺដោយធ្វើការភ្ជាប់ខ្លួនវាជាមួយនឹងកម្មវិធី App ផ្សេងៗ ហើយកម្មវិធីទាំងនោះគឺជាប្រភេទកម្មវិធីដែលអ្នកបានទាញយកពីប្រភពផ្សេងមួយក្រៅពី Google Play Store។
ពេលខ្លះ កម្មវិធីកម្ចាត់មេរោគអាចធ្វើការកាក់ចាប់មេរោគដែលលួចបន្លំចូលមកកាន់ទូរសព្ទរបស់អ្នកតាមវិធីភ្ជាប់ខ្លួនវាជាមួយនឹងកម្មវិធី Appផ្សេងៗ ប៉ុន្តែជាអកុសល វាមិនអាចធ្វើដូច្នេះបានទេជាមួយមេរោគ Daam ហើយនៅពេលអ្នកបានដំឡើងកម្មវិធីដែលមានផ្ទុកមេរោគ Daam នោះវានឹងធ្វើឱ្យអ្នកស្គាល់ថាពាក្យ “មហន្តរាយ” មានន័យយ៉ាងដូចម្តេចចំពោះទូរសព្ទរបស់អ្នក។
ខាងក្រោមនេះជាការសង្ខេបអំពីសមត្ថភាពរបស់មេរោគ Daam៖
- លួចកត់ត្រារាល់ការហៅចូល ឬចេញ សូម្បីតែពីកម្មវិធីភាគីទី៣ ដូចជា WhatsApp ក៏ដោយ។
- លួចឯកសាររបស់អ្នក រួមទាំងរូបភាព ឬវីដេអូ និងបញ្ជីទំនាក់ទំនងផងដែរ។
- លួចធ្វើកូដនីយកម្មលើឯកសាររបស់អ្នក ដើម្បីឱ្យអ្នកមិនអាចចូលប្រើវាបានទៀត។
- លួចផ្លាស់ប្ដូរពាក្យសម្ងាត់ ឬលេខសម្ងាត់ឧបករណ៍របស់អ្នក ដើម្បីចាក់សោអ្នកចេញពីទូរសព្ទរបស់អ្នក។
វាប្រៀបបាននឹងឃាតករសម្រាប់ឧបករណ៍របស់អ្នកដូច្នេះ សូមមានការប្រុសប្រយ័ត្នដើម្បីជៀសវាងពីការធ្លាក់ខ្លួនជាជនរងគ្រោះ។
សូមប្រុងប្រយ័ត្ន និងពិនិត្យមើលកម្មវិធីដែលមានបង្កប់មេរោគ Daam ដូចខាងក្រោម៖
អ្នកស្រាវជ្រាវបានតាមដាន ហើយកំណត់បានថា កម្មវិធី Psiphon, Boulders និង Currency Pro មានការភ្ជាប់មកជាមួយមេរោគ Daam រួចហើយ។ កម្មវិធីទាំងនោះគឺជាកម្មវិធី VPN កម្មវិធីហ្គេមទូរសព្ទ ក៏ដូចជាកម្មវិធីបម្លែងរូបិយប័ណ្ណផងដែរ។ ដូច្នេះ មិនមានរូបរាង ឬការរចនាបថជាក់លាក់ណាមួយរបស់កម្មវិធីទូរសព្ទ ដែលងាយស្រួលឱ្យយើងអាចធ្វើការកំណត់សម្គាល់ថាវាមានផ្ទុកមេរោគ Daam នោះទេ។
សម្រាប់ពេលនេះ វិធានសុវត្ថិភាពដ៏ល្អបំផុតដើម្បីជៀសវាងមេរោគប្រភេទនេះ គឺត្រូវធ្វើការទាញយកកម្មវិធីទូរសព្ទពី Google Play Store តែមួយគត់។ ខណៈពេលដែលយើងរកឃើញថា មេរោគDaam ក៏ព្យាយាមលួចចូលទៅក្នុង Google Play Store ដែរនោះ យើងក៏ច្បាស់ថាកម្មវិធីនេះមានសុវត្ថិភាពជាងកម្មវិធីណាផ្សេងៗពីនេះ។
ប្រសិនបើអ្នកបានទាញយកកម្មវិធីណាមួយនាពេលថ្មីៗនេះ ដែលមិនមែនមកពីប្រភពដែលអ្នកប្រាកដថាមានសុវត្ថិភាព ១០០% អ្នកគួរតែពិចារណាលុបពួកវាចេញដើម្បីសុវត្ថិភាព។ ខណៈពេលដែលមេរោគ Daam អាចការពារខ្លួនវាពីកម្មវិធីកម្ចាត់មេរោគមួយចំនួនបាន យើងនៅតែណែនាំឱ្យប្រើប្រាស់កម្មវិធីកម្ចាត់មេរោគដែលមានសមត្ថភាពខ្ពស់ ដើម្បីពង្រឹងសុវត្ថិភាពរបស់អ្នកនៅលើអ៊ីនធឺណិត៕
